2Cor 11 | JAE | STEP | Aŋô ŋoc biŋ meloc ŋagec acgommaŋ. Aê kajalagac gebe amac oc aŋô.

2 Corinthians 11

Paulu to aposolo dansaŋ

1 Aŋô ŋoc biŋ meloc ŋagec acgommaŋ. Aê kajalagac gebe amac oc aŋô. 2 Aê gajam lêmuŋ amac kêtôm Anôtô gêjam lêmuŋ gebe amac atôm awêtakiŋ ŋajam teŋ, taŋ kêsi eŋ kêtu ŋac tageŋŋa naŋ, tec gabe jawê amac andêŋ eŋ ana. Ŋac tau Kilisi. 3 Mago aê taêc dani amac gebe nêm ŋalêlôm, taŋ kêsap Kilisi tôŋ ŋaŋêŋgeŋ naŋ, oc êtu sec ma awi eŋ siŋ atôm Ewa, taŋ moac kêsau eŋ ŋa biŋdansaŋ tokauc naŋ. 4 Gebe ŋac teŋ embe wacênam mêtê êpi Jesu teŋ, taŋ aêac ajam mêtê kêpi atom, me embe akôc ŋalau teŋ sa, taŋ akôc sa aŋga aêacma atom, me embe ŋawae ŋajam teŋ, taŋ aêac akêŋ gêdêŋ amac naŋ atom, oc aŋô anac ŋawaegeŋ.

5 Aê kasaê tauc gebe “aposolosêga” tonaŋ lau tokauc sêlêlêc aê su nec atom. 6 Moae kasôm biŋ amboac kwapuc, mago ŋoc kauc amboac kwapucnêŋ atom. Biŋ tonaŋ aêac awa sa gêdêŋ amac gêc awêgeŋ ŋa biŋ to lêŋ tokaiŋtokaiŋ.

7 Aê gabu tauc gebe jatoc amac sa ma kasôm Anôtônê ŋawae ŋajam lasê kakôc ŋaôli gêjô su atom, tec gagôm sec me. 8 Gôlôac dabuŋ ŋagêdô sêjam ôli aê gebe janam sakiŋ amac. Aê galic amboac kajaŋgo gêŋ aŋga êsêacnêŋ. 9 Gêdêŋ taŋ gamoa gawiŋ amac tokapô lêna ŋêŋgeŋ naŋ, aê kaêlênsôŋ amac ma kateŋ gêŋ aŋga amacnêm ŋac teŋ nê atom. Lasitêwai taŋ sêmêŋ aŋga Makedonia naŋ, sêjam ŋoc kêpô lêna sa. Aê gajob tauc ma oc jajop tauc ŋapep gebe jakêŋ wapac teŋ êndêŋ amac atomanô. 10 Kilisinê biŋŋanô gêjam aê auc, tec jasôm êtu tôŋ gebe ŋoc waec tonaŋ ŋawae êmbacnê aŋga Akaia ŋagamêŋ samob atomanô. 11 Aê kasôm biŋ tau kêtu asageŋŋa. Kasôm gebe têtac gêwiŋ amac atom me. Anôtô kêjala gebe têtac gêwiŋ amacgac.

12 Gêŋ taŋ gagôm gamoa naŋ, oc jawi siŋ atom, gebe jakô êsêac, taŋ sebe tetoc tauŋ sa ma sêsôm gebe sêjam kôm têtôm aêac naŋ, waeŋ auc. 13 Lau tônê ŋai êsêac aposolo dansaŋ. Êsêac koleŋwaga dansaŋ, taŋ sêjam Kilisinê aposolo laŋôŋ naŋ. 14 Biŋ tonaŋ êtakê amac atommaŋ, gebe Sadaŋ tau gêjam aŋela ŋawêŋa laŋô. 15 Tec ênê sakiŋwaga embe sênam sakiŋwaga biŋgêdêŋŋa laŋôŋ, oc alic amboac gêŋ kaiŋ teŋ atom. Êtu ŋamu êsêac têtap ŋagêjô sa êtôm nêŋ kôm, taŋ sêjam naŋ.

Paulu gêôc ŋandaŋ taêsam kêtu eŋ aposoloŋa

16 Aê jasôm ŋoc biŋ êtiam gebe alic aê amboac ŋac meloc atom. Mago embe alic aê amboac ŋac meloc, naŋ alicmaŋ, tageŋ alôc sa gebe jalanem tauc ŋagec acgom. 17 Biŋ tec jasôm nec Apômtaunê biŋ atom. Aê jasôm biŋ lanemŋa tonec amboac ŋac meloc teŋ. 18 Lau taêsam sêlanem tauŋ kêtu biŋ ŋamalacŋa, tec gabe jalanem tauc êtu tonaŋŋa êwiŋmaŋ. 19 Amac taôm lau tokaucgac, mago aŋô lau meloc nêŋ biŋ ajac ŋawaegeŋ. 20 Ŋac teŋ embe êkôniŋ amac atu ênê sakiŋwaga, me êniŋ amacnêm mo ŋaômageŋ, me êkôc amacnêm gêŋ, me etoc tau sa, me êtap amac laŋômanô auc, oc alic ŋajam. 21 Aê jasôm tomajocgeŋ gebe aêacma ŋajaŋa masi, tec agôm gêŋ amboac tonaŋ atom.

Mago ŋac teŋ embe êkiaŋ tau sa gêŋ teŋŋa, go jakiaŋ tauc sa amboac tonaŋgeŋ. Galoc kasôm biŋ amboac ŋac meloc kêtiam. 22 Êsêac Ebolaiwaga me. Aê amboac tonaŋ. Êsêac Israelwaga me. Aê amboac tonaŋ. Êsêac Abrahamnê wakuc me. Aê amboac tonaŋ. 23 Êsêac Kilisinê sakiŋwaga me. Aê jasôm ŋagêbôcŋageŋ gebe Aê gajam sakiŋ Kilisi kêlêlêc êsêac su. Aê gajam koleŋ kêlêlêc êsêac. Aê gêŋgôŋ kapoacwalô kêtu dim taêsam, si aê kêlêlêc e kêdabiŋ gebe jamac êndu. 24 Judawaga si aê kêtu dim lemeŋ teŋ kakôc sêm 39 kêtômgeŋ. 25 Si aê ŋa sêm kêtu dim têlêac kêtiam, ma gêdêŋ ŋasawa teŋ gadam kapoac gwêc geleŋŋa samuc teŋ ma gêbêcauc samuc teŋ. 26 Aê kasêlêŋ gajac laoc gamêŋ todim-todim, galom bu secsec, ma kêjaŋgowaga to aê tauc ŋoc lau ma lau samuc dêdib aê ŋawaô sebe sênac aê êndu. Aê gêŋgôŋ malac to gamoa gamêŋ sawa ma kapoac gwêc to gaŋgôŋ gawiŋ lasitêwai dansaŋ ma gamoa jageo ŋanô. 27 Aê gajam koleŋ e tekoc gêbac ma gêbêc taêsam gaêc bêc atom. Mo to bu gêjô aê ma kêpô lêna tauc gêŋ taniŋŋa samucgeŋ ma malo gêjam aê ma ŋoc ŋakwê masi. 28 Aê gabe jasa biŋ ŋagêdô sa êwiŋ atom, tageŋ tonec gebe kêtôm bêcgeŋ kêpô sim tauc kêtu gôlôac dabuŋ samobŋa, tec kêkôniŋ aê tôŋ ŋanôgeŋ. 29 Ŋac teŋ embe êtu palê, go aê jatu paŋ atom me. Sec ŋalip embe ênac ŋac teŋ, go aê têtac ŋandaŋ êsa atom me.

30 Lau embe sêkac aê gebe jalanem tauc, go jalanem tauc êtu ŋoc palêpalêŋageŋ. 31 Apômtau Jesu Tama Anôtô, taŋ aêac têlanem eŋ endeŋ tôŋgeŋ naŋ, tec kêjala gebe kasau atom. 32 Gêdêŋ taŋ aê gamoa Damasku naŋ, kiŋ Areta nê gôliŋwaga kêsôm gebe sêlai Damasku ŋakatam auc sebe sêkôc aê tôŋ. 33 Mago sêkêŋ aê kasêp sêm, taŋ sêwa kêtôm talu teŋ naŋ, ma sêlêwaŋ aê kasa katam sauŋ teŋ kasêp tuŋbôm ŋamagêŋa gamêŋ, tec gaêc êsêac lemeŋ su.